Valmúaökrum fer fækkandi í Afganistan

Valmúaökrum í Afganistan hefur farið fækkandi síðastliðið ár og ópíumframleiðslan hefur dregist saman ef marka má nýja skýrslu sem Sameinuðu þjóðirnar hafa birt. Þar segir að af þrjátíu og fjórum héröðum í Afganistan séu rúmlega helmingur þeirra laus við valmúarækt en í fyrra voru aðeins þrettán án valmúaakra.

En þrátt fyrir þennan árangur er eitt hérað sem sker sig úr. Helmand hérað, sem er eitt sterkasta vígi Talíbana í landinu hefur aldrei framlett jafn mikið magn af ópíumi og hefur framleiðslan aukist um 50 prósent frá því í fyrra. Það lætur því nærri að tæp 70 prósent alls ópíums sem framleitt er í Afganistan komi frá Helmand héraði. Og þrátt fyrir þennan árangur á landsvísu er Afganistan enn stærsti ópíumframleiðandi í heimi, en ópíum er notað til þess að búa til Heróín.