Íslendingur lét niðrandi orð falla um árásarmenn

Tveir ungir menn, sem handteknir voru vegna hnífsstunguárásar á 25 ára íslenskan karlmann á Vesturbrú í Kaupmannahöfn í nótt, voru látnir lausir samkvæmt ákvörðun dómara í borginni. Eftir því sem segir á vef Berlingske Tidende báru mennirnir tveir fyrir sig sjálfsvörn.

Íslendingurinn og félagi hans munu hafa látið niðrandi orð falla um kynþátt árásarmannanna og voru Íslendingarnir mjög ögrandi í fasi. Það leiddi til þess að til átaka kom og dró annar árásarmannana, sautján ára piltur, upp hníf og stakk annan Íslendinginn. Átökin áttu sér stað í söluturninum Bobbys Kiosk á Colbjörnsgade en hann er í eigu annars árásarmannanna, sem er 21 árs.

Íslendingurinn var stunginn sjö sinnum í handleggi, bak og brjóst og þá segir B.T. að járnstöng hafi einnig verið notuð í árásinni. Íslendingurinn var fluttur á sjúkrahús en reyndist ekki í lífshættu. Hann hefur nú farið í aðgerð vegna áverka sinna.

Árásarmennirnir flýðu af vettvangi en lögregla elti þá uppi og handtók þá. Berglingske segir að mennirnir verði ákærðir fyrir tilraun til manndráps og hefur sá yngri viðurkennt að hafa notað hníf í árásinni. Að mati dómarans gerði hann það hins vegar í nauðvörn í slagsmálunum og var hann því ekki úrskurðaður í gæsluvarðhald eins og lögregla fór fram á.

Þá var að mati dómarans ekki forsenda fyrir gæsluvarðhaldi yfir mönnunum með tilliti til rannsóknarhagsmuna. Ákæruvaldið hefur áfrýjað þesari ákvörðun til landsréttar.