Vill deyja sem píslarvottur

Tveir meðlimir al Qaeda sem ákærðir eru í tengslum við hryðjuverkaárásirnar þann 11.september 2001 sögðu fyrir rétti í dag að þeir vildu deyja sem píslarvottar.

„Ef ég verð tekinn af lífi, vil ég deyja í þágu Guðs," sagði Ramzi bin al-Shibh, sem er ákærður fyrir að hafa hjálpað við að skipuleggja árásirnar.

„Ég hef sóst eftir því að verða píslarvottur í mörg ár."

Khalid Sheikh Mohammed, sem talinn er vera heilinn á bak við árásirnar sagðist vilja losna við lögfræðing sinn og játaði sig sekann.

Dómarinn, Marine Col. Ralph Kohlmann, spurði Mohammed margsinnis hvort hann gerði sér grein fyrir að þá ætti hannyfir höfði sér dauðarefsingu. Mohammed svaraði því til að hann gæti ekki samþykkt neinn lögfræðing því hann tryði aðeins á Sharia, eða íslömsk lög.

„Það er það sem ég vil. Ég vil verða píslarvottur," sagði hann.

Mennirnir létu þessi orð falla við herdómstólinn við Guantanamo Bay á Kúbu, þar sem þeir hafa beðið lengi eftir réttarhöldunum.