Clinton og Obama fara ekki saman í slaginn

Hillary Clinton ætlar ekki að sækjast eftir því að verða varaforsetaefni Baracks Obama í komandi forsetakosningum í Bandaríkjunum. Þetta segir kosningastjóri Hillary og bætti því við að Obama ætti valið. Obama leitar nú logandi ljós að varaforsetaefni og hafa nokkrir verið nefndir.

Obama tryggði sér á þriðjudaginn þann fjölda kjörmanna sem þarf á landsþing demókrata í lok ágúst til að fá útnefningu flokksins fyrir kosningarnar.Clinton viðurkenndi ekki ósigur sinn í gær en í morgun sendi hún stuðningsmönnum bréf þar sem hún boðar til fundar með þeim í Washington á laugardaginn. Á þeim fundi ætli hún að óska Obama til hamingju og lýsa yfir stuðningi við framboð hans.

Þar með verður endir bundinn á sextán mánaða langa leit Demókrataflokksins að forsetaefni.

Obama er sannfærður að hægt verði að sameina flokkinn sem hefur klofnað vegna baráttu þeirra.

Obama hefur skipað þriggja manna uppstillingarnefnd til að búa til lista yfir vænleg varaforsetaefni. Caroline Kennedy, dóttir John F. Kennedy fyrrum forseta Bandaríkjanna, er í þessari nefnd.

Meðal þeirra sem nefndir eru sem möguleg varaforsetaefni eru Bill Richardson, ríkisstjóri í Nýju Mexíkó sem einnig sóttist eftir að verða forsetaefni demókrata, Jimm Webb, öldungadeildarþingmaður frá Virginíu, og Wesley Clark, fyrrverandi yfirmaður herafla Atlantshafsbandalagsins.