Fiskimönnum lendir saman við lögreglu í Brussel

Óeirðir brutust út í dag þegar fiskimönnum lenti saman við lögreglu við mótmæli þeirra á háu olíuverði fyrir utan aðalbyggingar Evrópusambandsins í Brussel í dag. Nokkrar rúður brotnuðu í byggingum sambandsins og að minnsta kosti einum bíl var snúið á hvolf í mótmælunum.

Fiskimennirnir segjast munu hætta vinnu ef að Evrópusambandið geri ríkistjórnum ekki kleift að styðja þá fjárhagslega og niðurgreiða elsneyti þeirra. Fiskimenn í Frakklandi hafa verið í verkfalli í nokkrar vikur vegna eldsneytisverðs sem hefur hækkað um 240% síðustu fimm ár. Síðustu daga hafa fiskimenn frá Bretlandi, Spáni, Portúgal og Ítalíu sameinast þeim.