Merkel fordæmir ákvörðun Rússa

Angela Merkel, kanslari Þýskalands, fordæmdi í dag þá ákvörðun Dmitry Medvedevs forseta Rússlands að viðurkenna sjálfstæði Abkasíu og Suður-Ossetíu, sjálfstjórnahéraða í Georgíu. Merkel, sem stödd er í Eistlandi, sagði ákvörðunina algjörlega óviðunandi.

Að hennar sögn munu næstu skref í samskiptum Rússa og Evrópusambandsins verða tekin á fundi sambandsins sem halda á í næstu viku.

Leiðtogar aðskilnaðarsinna í Suður-Ossetíu hafa hinsvegar fagnað fréttunum og hafa þeir farið þess á leit við Rússa að þeir komi sér upp herstöð í héraðinu.