Lokuðu kjarnorkuveri vegna raksápu

Raksápa varð til þess að sænsk yfirvöld ákváðu í síðasta mánuði að loka Oskarshamn-kjarnorkuverinu af ótta við hryðjuverk. Frá þessu greina norrænir miðlar í dag.

Þann 21. maí var logsuðumaður handtekinn við innganginn á kjarnorkuverinu eftir að mælitæki sýndu að leifar af sprengifimu efni væru á bakpoka hans. Maðurinn og samstarfsmaður hans voru yfirheyrðir og heimili þeirra rannsökuð en þeim sleppt daginn eftir.

Tæknirannsóknir hafa nú leitt í ljósi að það var raksápuhylki sem setti eftirlitskerfið við innganginn í gang og því hafa mennirnir tveir endanlega verið hreinsaðir af ásökunum um að hafa ætlað að sprengja kjarnorkuverið í loft upp.

Það fylgir fréttinni að umstangið reynist sænskum yfirvöldum dýrt því kostnaður við það að loka kjarnorkuverinu og leita að meintum sprengjum nemur um 1,3 milljörðum króna.