Ísraelar loka landamærum að Gaza

Ísraelar lokuðu í morgun landamærum sínum að Gaza-svæðinu. Það er svar við flugskeytaárás herskárra Palestínumanna þaðan á Suður-Ísrael í gær. Ísraelsmenn segja það gróft brot á vopnahlésskilmálum.

Vopnahlé milli Ísraela og Hamas-liða á Gaza tók gildi á fimmtudaginn í síðustu viku. Það á að gilda í hálft ár hið minnsta. Opnað var fyrir hluta landamæranna að Gaza sem Ísraelar lokuðu fyrir nokkru vegna flugskeytaárása þaðan. Nauðsynjavörur tóku að berast íbúum Gaza á ný og allt virtist á réttri leið.

í morgun lokuðu Ísraelar fyrir slíka flutninga vegna flugskeytaárásar liðsmanna Heilags stríðs á suðurhluta Ísraels frá Gaza í gær. Hún var hefnd fyrir árás Ísraelshers á Vesturbakkanum sem kostaði tvo liðsmenn samtakanna lífið. Engan sakaði í flugskeytaárásinni sem er sú fyrsta síðan vopnahléð tók gildi.

Hamas-liðar eru ósáttir við ákvörðun Ísraela og segja hana brot á vopnahléssamkomulaginu. Ekki sé við Hamas að sakast með beinum hætti vegna árásarinnar í gær auk þess sem þeir hafi hvatt herskáa á Gaza til að hætta árásum.

Heima fyrir eru ísraelsk stjórnvöld harðlega gagnrýnd fyrir að hafa ekki fengið það í gegn sem hluta af vopnahléssamkomulaginu að ísraelski hermaðurinn Gilad Shalit yrði látinn laus úr haldi. Tvö ár eru í dag frá því Hamas-liðar rændu Shalit nærri landamærunum að Gaza. Mörg hundruð Ísraelar komu saman í Jerúsalem í gærkvöldi og létu óánægju sína í ljós.

Ehud Olmert, forsætisráðherra, hefur átt undir högg að sækja vegna þessa og ásakana um spillingu. Í morgun tókst honum að koma í veg fyrir snemmbúnar kosningar. Ráðherrar í Verkamannaflokknum, samstarfsflokki í stjórn Kadímaflokks Olmets, höfðu hótað því að styðja vantrauststillögu stjórnarandstöðunnar sem hefðu knúið fram kosningar. Liðsmenn Verkamannaflokksins hættu við það í morgun eftir að samið var um að leiðtogakjör færi fram í Kadímaflokknum í september. Stjórnmálaskýrendur segja nær öruggt að Olmert tapi þeirri kosningu.