Obama ætlar til Írak

Barack Obama íhugar nú að fara til Írak í sumar, en það yrði fyrsta ferð hans frá því að hann gaf kost á sér í embætti forseta Bandaríkjanna.

Þetta hefur bandaríska dagblaðið New York Times eftir talsmönnum Obama. John McCain forsetaframbjóðandi hefur gagnrýnt Obama fyrir það hversu langur tími er liðinn síðan að hann kom þangað síðast. Fyrr í vikunni stakk McCain svo upp á því að þeir tveir færu þangað saman. Obama segist ekki vilja taka þátt í slíkri ferð. Hann segist vilja ferðast þangað á eigin vegum og kynnast starfi hermanna í Írak.

Eina skiptið sem Obama hefur komið til Írak var í janúar 2006 þegar hann fór þangað sem þingmaður. McCain hefur gagnrýnt hann harðlega fyrir að hafa ekki farið þangað aftur og Repúblikanaflokkurinn tók undir þá gagnrýni í gær með því að birta klukku á netinu sem telur dagana frá því að hann fór síðast. McCain segir að málið snúist um leiðtogahæfni og viljann til að læra. Það væri rangt af Obama að segja að hernaðurinn í Írak væri engum árangri að skila og því þyrfti að kynna fyrir honum staðreyndir málsins.