Tveir létust í jarðskjálftanum í Grikklandi

Tveir menn létu lífið í hörðum jarðskjálfta á Pelópsskaga í Grikklandi í dag. Tuttugu manns slösuðust og enn er verið að leita að fólki í húsarústum.

Eftirskjálftar hafa skotið mönnum á svæðinu skelk í bringu. Skjálftinn varð í hádeginu, að íslenskum tíma, og olli verulegum skemmdum.

Sextugur karlmaður lét lífið þegar þakið á húsinu hans hrundi yfir hann og áttræð kona fékk hjartaáfall þegar jörðin skók þorpið hennar. Nú síðdegis lágu enn margir ósjálfbjarga í rústum húsa. Viðstaddir fögnuðu ákaft þegar björgunarmenn fundu stúlku í húsarústum og náðu henni út. Vitað er um tuttugu manns sem slösuðust í skjálftanum.

Skjálftinn var 6,5 stig. Upptök hans eru á Pelopsskaga, 35 kílómetra suðvestur af hafnarborginni Patras. Fólk fann fyrir skjálftanum í Aþenu í 125 kílómetra fjarlægð, þar sem jörð skalf í 20 sekúndur, og jafnvel á sunnaverðri Ítalíu.

Jarðskjálftar eru algengir í Grikklandi. Fyrir níu árum létust 140 manns í stórum skjálfta í Aþenu. Í febrúar á þessu ári varð álíka stór skjálfti og nú en þá urðu engin slys á fólki. Eftir skjálftann í dag hljóp fólk óttaslegið út á götu.

Ekki bætti úr skák að símkerfið lá niðri og fólk gat því ekki haft samband við umheiminn. Þjóðvegurinn milli Aþenu og Patrs rofnaði þegar skriða féll á hann.