Fylgi breska Verkamannaflokksins hefur aldrei mælst minna

Samkvæmt nýrri skoðanakönnun hefur fylgi breska Verkamannaflokksins aldrei mælst minna í sögunni. Þetta er enn eitt áfallið fyrir Gordon Brown forsætisráðherra sem horfir fram á mikil pólitísk átök innan þingflokks síns á miðvikudag.

Fylgi Verkamannaflokksins mældist aðeins 26% í þessari könnun meðan að Íhaldsflokkurinn mældist með 40% fylgi. Ef gengið yrði til kosninga í Bretlandi nú þýddu þessar tölur að Íhaldsflokkurinn fengi hreinan meirihluta á breska þinginu.

Á miðvikudaginn kemur horfir Gordon Brown fram á uppreisn um 50 þingmanna í flokki sínum. Þá verður tekin til afgreiðslu í þinginu tillaga stjórnarinnar um að fjölga þeim dögum sem hryðjuverkamenn geta verið í haldi lögreglu án ákæru úr 28 dögum í 42 daga.

Þingmennirnir 50 sem hér um ræðir ætla að greiða atkvæði gegn tillögunni sem og Íhaldsflokkurinn. Íhaldsflokkurinn er alfarið á móti tillögunni þar sem hann telur hana gróft brot á einstaklingsfrelsinu.