Liverpool hækkar boð sitt í Barry

Eftir því sem fram kemur í enskum fjölmiðlum í dag hefur Liverpool hækkað boð sitt í Gareth Barry, leikmann Aston Villa, úr tíu milljónum punda í tólf.

Martin O'Neill, stjóri Villa, sagði á sínum tíma að félagið hefði umsvifalaust hafnað tilboði Liverpool.

O'Neill og Rafael Benitez, stjóri Liverpool, hafa skipst á skotum undanfarið í fjölmiðlum. Sá fyrrnefndi hefur sakað Benitez um að koma fram af of mikilli ákefð. Benitez hefur aftur á móti ráðlagt O'Neill að sætta sig við að Barry hafi mikinn metnað til að spila í Meistaradeild Evrópu sem Aston Villa eigi erfitt með að veita honum tækifæri til.

Aston Villa hefur boðið Barry launahækkun upp á 30 þúsund pund á viku ef hann vill vera áfram hjá félaginu.