Medvedev vill ekki að Úkraína gangi í Nató

Dmitry Medvedev, forseti Rússlands hefur varað Viktor Yushchenko, forseta Úkraínu við því að Úkraína gangi í Nató. Ef fari svo þá muni samskipti á milli Rússlands og Úkraínu stirðna í kjölfarið. Forsetarnir tveir eru um þessar munir á óformlegum leiðtogafundi 12 fyrrum Sovétríkja.

Yushchenko, sem hefur viljað auka samskipti við hinn vestræna heim, hefur tryggt sér loforð frá Nató að Úkraína megi ganga í sambandið í framtíðinni. Þetta samkomulag hefur farið í taugarnar á rússneskum yfirvöldum en vangaveltur voru um hvort Medvedev yrði hlýrri í garð Úkraínumanna en forveri hans Vladimir Pútín. Hann virðist hins vegar ætla að ganga hinn troðna veg Pútíns í samskiptum Rússa og Úkraínumanna.

Medvedev hefur einnig tilkynnt að Rússland muni nær tvöfalda verð á gasi til Úkraínu frá fyrsta janúar 2009. Hann neitar að það sé af pólitískum ástæðum heldur segir það vera vegna aukins kostnaðs í Mið-Asíu. Þessar tvær þjóðir hafa hins vegar átt í deilum yfir gasi þar sem Rússland hefur skorið á birgðir á gasi til Úkraínu og Úkraínumenn sakað Rússa um að nota gasið sem pólitískt vopn.