Búa sig undir skjóta lokun

Robert Gates, varnarmálaráðherra í ríkisstjórn George W. Bush, hefur beðið starfsfólk sitt í varnarmálaráðuneytinu um að búa sig betur undir hugsanlega lokun Guantánamo-fangabúðanna á Kúbu.

Gates verður áfram varnarmálaráðherra þegar Obama tekur við í janúar, en Obama hefur sagt að það verði forgangsverkefni sitt að loka þessum illræmdu fangabúðum.

Nú í vikunni var einn fangi látinn laus úr búðunum eftir nærri sex ára vist þar. Mustafa Ait Idr heitir hann, er 38 ára gamall bosnískur ríkisborgari en upprunalega frá Alsír.

Hann segir að sér hafi verið misþyrmt og hann verið niðurlægður meðan á fangavistinni stóð. „Ekkert er verra en það,“ sagði hann í viðtali við sjónvarpsstöðina Hayat eftir að hann kom til Bosníu á þriðjudag, og fullyrti að Guantánamo-búðirnar væru versti staður sem hægt væri að ímynda sér.

Hann segir einn fingra sinna hafa verið brotinn í yfirheyrslum og að fangaverðir hafi lítilsvirt Kóraninn, hina helgu bók múslima, með því að kasta honum inn á salerni, rífa blöð úr honum og setjast á hann.

„Þeir misþyrmdu okkur, ekki vegna þess að við værum hryðjuverkamenn heldur vegna þess að við erum múslimar,“ segir hann.

Ait Idr var handtekinn í Bosníu árið 2001 ásamt tveimur öðrum Bosníumönnum, sem einnig voru fæddir í Alsír. Þeir voru grunaðir um að hafa ætlað að gera sprengjuárás á bandaríska sendiráðið í Sarajevó. Í ársbyrjun 2002 voru þeir fluttir til Guantánamo, en Bandaríkjastjórn segir nú að engar þær sannanir séu fyrir hendi sem myndu duga til að sakfella þá.

Það var Richard J. Leon, héraðsdómari í Bandaríkjunum, sem í nóvember kvað upp þann úrskurð að mennirnir þrír, ásamt tveimur öðrum Alsírmönnum, skyldu látnir lausir. Hann segir að einu vísbendingarnar um tengsl þeirra við hryðjuverkasamtökin Al Kaída komi frá einum heimildarmanni, sem ekki er nafngreindur. Sú heimild geti engan veginn talist trúverðug ein og sér.

„Meira að segja Bandaríkjamennirnir sögðu mér: Við vitum ekki hvers vegna þú ert hérna,“ sagði Ait Idr, og sagðist vonast til þess að Barack Obama léti fljótlega loka þessum fangabúðum.