Birgjar dragi úr hækkunum ef krónan styrkist

„Það er von á hækkunum á næstu dögum en ef krónan styrkist frekar reiknum við fastlega með að birgjar dragi hækkanir að einhverju leyti til baka sem skilar sér svo auðvitað út í verslanirnar," sagði Eysteinn Helgason, framkvæmdastjóri Kaupáss hf. sem rekur verslanir Nóatúns, 11-11 og Krónunnar. Hann sagði ómögulegt að slá nokkru föstu um hve miklar hækkanirnar yrðu í prósentum talið, vöruflokkar margir og vægi þeirra mismunandi, en fyrirtækið ætlaðist til þess að birgjar drægju úr hækkunum ef krónan styrktist. „Við bíðum aðeins með hækkanirnar til að sjá hvernig málin þróast," sagði Eysteinn.

Finnur Árnason, forstjóri Haga, sem m.a. reka Bónus, 10-11 og Hagkaup, greindi frá því í viðtali við Rás 1 í morgun að búast mætti við 20% hækkun á innfluttum matvælum.

Neytendur fylgist með

Hildigunnur Hafsteinsdóttir, stjórnandi leiðbeininga- og kvörtunarþjónustu Neytendasamtakanna, sagði hækkanir auðvitað viðbúnar við gengishrun á borð við það sem varð í síðustu viku. „Auðvitað þyrfti að koma til einverra aðgerða af hálfu ríkisvaldsins þegar svona lagað gerist. Neytendasamtökin hafa fengið gríðarlegt magn ábendinga og fyrirspurna vegna verðhækkana en verðlag er auðvitað frjálst svo okkar helsta ráð er að hvetja neytendur til að fylgjast vel með og versla frekar á ódýrari stöðum. Það er auðvitað mjög skringilegt að kaupmenn hækki bara verð um leið og gengið hækkar, jafnvel án þess að þeir hafi fengið nýjar vörur," sagði Hildigunnur.

Hún sagði frá því að ef samtökunum bærust ábendingar um hækkun sem væri alveg út úr kortinu sendu þau viðkomandi kaupmanni fyrirspurn með beiðni um rökstuðning. Samkeppniseftirlitið hefði á sínum tíma verið beðið um að skoða hækkanir á matvöru en því hefði verið hafnað á grundvelli þess að verðlagseftirlit væri ekki á könnu þeirrar stofnunar.