Komu í veg fyrir aðgerðir í loftslagsmálum

Repúblikanar í öldungadeild Bandaríkjanna komu í veg fyrir það í gær að frumvarp um aðgerðir í loftslagsmálum geti orðið að veruleika í ár.

Frumvarpið gerði ráð fyrir því að útblástur gróðurhúsalofttegunda yrði minnkaður smám saman þannig að árið 2050 yrði hann 71 prósent minni en árið 2005.

Repúblikanar eru í minnihluta í öldungadeild Bandaríkjaþings en nógu margir þeirra hótuðu málþófi til að ekkert varð úr að frumvarpið næði fram að ganga.

Stjórn Bush Bandaríkjaforseta lagðist gegn frumvarpinu og sagði að hækkandi bensínverð sýndi hversu hættulegt það gæri reynst fyrir hagkerfi Bandaríkjanna að framfylgja lögum sem takmörkuðu útblástur.