Væntanleg heimsókn Obama til Berlínar veldur ólgu

Stjórnvöld í Þýskalandi neita fyrir að Bandaríkjastjórn hafi sett pressu á kanslara Þýskalands, Angelu Merkel, að koma í veg fyrir að Barack Obama haldi ræðu í Berlín í lok júlí.

Stærstu fréttamiðlar Þýskalands á borð við Bild og Frankfurter Allgemeine Zeitung, sögðu frá því að ráðamenn Bandaríkjanna hefðu á G8-ráðstefnunni í Japan lýst andstöðu sinni yfir ræðuhöldum Obama í Þýskalandi og þrýst á kanslarann að koma í veg fyrir heimsóknina. Talsmaður Merkel hefur hins vegar þvertekið fyrir allar slíkar vangaveltur og sagði hann við fjölmiðla í dag að Obama væri meira en velkominn.

Ræðuhöld Obama í Berlín munu fara fram í lok mánaðarins við Brandenborgarhliðið, helsta sameiningartákn allra Berlínarbúa, og eru hluti af stuttri Evrópuför bandaríska forsetaframbjóðandans.

Ólga í stjórnarsamstarfinu?

Annar aðstoðarmaður Merkel hafði reyndar á miðvikudag sagt að það færi fyrir brjóstið á henni að Brandenborgarhliðið yrði notað í kosningabaráttu Obama. Í kjölfarið lýsti utanríkisráðherra landsins, Frank-Walter Steinmeier, því yfir að það væri heiður að fá Obama í heimsókn til landsins.

Þýskir fjölmiðlar túlkuðu þessi viðbrögð sem spennu innan þýsku ríkisstjórnarinnar en Merkel og Steinmeier koma úr sitthvorum stjórnarflokknum. Steinmeier er sósíaldemókrati og Merkel kristilegur demókrati en búast má við harðri baráttu þeirra á milli á komandi misserum því blásið verður til kosninga í Þýskalandi á næsta ári.

Deilurnar hafa hins vegar verið blásnar af í bili því á sameiginlegum blaðamannafundi í dag sagði talsmaður Merkel, Ulrich Wilhelm, að „Steinmeier og Merkel hlökkuðu bæði til væntanlegrar heimsóknar Obama".