Obama heimsækir Evrópu í næstu viku

Barak Obama ætlar að fara í fyrstu Evrópuferð sína í næstu viku, sem forsetaframbjóðandi Demókrataflokksins í Bandaríkjunum. Hann áætlar að heimsækja sjö ríki á jafnmörgum dögum.

Fyrsta stopp Obama í ferðinni verður London en síðan er förinni heitið til Frakklands og Þýskalands. Einnig mun Obama heimsækja Ísrael og Jórdan og reiknað er með að hann muni eiga viðkomu í Írak og Afganistan þótt ekkert sé gefið uppi um síðustu tvö löndin af öryggisástæðum.

Breska blaðið The Times segir í dag að þótt Obama eigi von á hlýlegum viðtökum í Evrópu muni margir vilja spyrja hann út í breytt viðhorf hans til stríðsins í Írak. Í kosningabaráttu sinni sagði Obama að hann ætlaði að kalla bandaríska herinn heim frá Írak sextán mánuðum eftir að, og ef, hann næði kjöri. Síðan hefur hann dregið í land með þá tímasetningu sína.

Samkvæmt The Times mun Obama stoppa stutt í London og hitta þar að máli bæði Gordon Brown forsætisráðherra og David Cameron formann Íhaldsflokksins. Einnig mun hann eiga fund með breskum stuðningsmönnum sínum sem létu mikið fé af hendi rakna til kosningabaráttu hans.