Bush óskar Obama til hamingju með sigurinn

George Bush bandaríkjaforseti óskaði í dag Barack Obama til hamingju með að hafa tryggt sér útnefningu sem forsetaefni Demókrataflokksins. Dana Perino, talsmaður Hvíta hússins, sagði Bush sjálfan þekkja vel hve erfitt ferli forkosningarnar væru, og að afrek Obama væri töluvert.

Obama náði í gær tilskyldum fjölda kjörmanna til að tryggja sér meirihluta á flokksþingi demókrataflokksins í sumar. Hann varð þar með fyrsti blökkumaðurinn í sögunni sem hlýtur útnefningu sem forsetaefni annars tveggja stærstu flokkanna.   

Hillary Clinton, helsti andstæðingur Obama í forkosningunum,  hefur enn ekki viðurkennt ósigur, en búist er við að hún geri það í dag.