Þrír danir látnir í Afganistan

Þrír danskir hermenn létust sprengingu í Helmand-sýslu í Afghanistan í dag og sá fjórði liggur særður á sjúkrahúsi. Þetta er mannskæðasta árás sem danski herinn í landinu hefur orðið fyrir.

Samkvæmt heimildum Extra blaðsins voru mennirnir á aldrinum 21 til 23 ára. Mennirnir voru í bílalest sem flutti vistir milli herbúða þegar bíll þeirra keyrði yfir jarðsprengju í vegkantinum

21 danskur hermaður hefur látist við störf í Afganistan. Poul Kiærskou, yfirmaður danska heraflans í landinu sagði í tilkynningu til fjölmiðla að málið væri mikið áfall og missirinn fyrir aðstandendur hermannanna væri óbærilegur.

Fjölmiðlar hafa eftir yfirmanni varnarmála í Danmörku að ekki standi til að draga herliðið heim frá Afganistan. Allt yrði hinsvegar gert til að hjálpa aðstandendum hinna föllnu.