Kjarnorkuvopnageymslur Bandaríkjamanna enn í ólestri

Bandaríski flugherinn hefur rétt einu sinni fengið skömm í hattinn fyrir gjörsamlega ófullnægjandi geymslu á kjarnavopnum.

Kjarnorkuvopnabúr á vegum bandaríska flughersins stóðst ekki skoðun eftirlitsaðila sem fylgjast með því að nægilega vel sé búið að kjarnavopnabirgðum hersins. Þetta er í fimmta skiptið á þessu ári sem geymslustöð kjarnavopna á vegum Bandaríkjahers telst ófullnægjandi en í þetta skiptið var það vegna skorts á bókhaldi yfir þau vopn sem áttu að vera á svæðinu.

Herinn hefur 90 daga frest til að bæta úr þessu en ekki er lengra síðan en í júní þegar dagblaðið Financial Times komst yfir leynilega skýrslu varnarmálaráðuneytis Bandaríkjanna um yfir eitt þúsund kjarnorkuvopn eða hluta úr slíkum vopnum sem Bandaríkjaher hefur ekki hugmynd um hvar eru niður komin.

Þá komst herinn enn í fréttirnar á árinu fyrir að senda hluta af burðarflaugum fyrir kjarnorkusprengjur til Taívan í misgripum fyrir þyrluvarahluti. Við skulum vona að gæslumönnum stærsta vopnabúrs veraldar takist að koma jólakortunum sínum í póst klakklaust.