Fjöldamorðingi í Frakklandi í lífstíðarfangelsi

Sextíu og sex ára gamall Frakki, Michel Fourniret, var í dag dæmdur í lífstíðarfangelsi fyrir að hafa myrt sjö stúlkur á árunum 1987 og 2001.

Fourniet, sem nefndur hefur verið skrímslið í Ardennes, viðurkenndi að hafa rænt stúlkunum og myrt þær en um er að ræða eitt stærsta mál fjöldamorðingja í Frakklandi í áratugi.

Kona Fournirets var einnig dæmd í lífstíðarfangelsi fyrir að aðild að morðunum en hún hjálpaði bónda sínum að klófesta stúlkurnar sem voru á aldrinum 12 til 22 ára. Þeim var rænt í Ardenne-héraði í norðurhluta Frakklands og í Belgíu. Fourniret ók að stúlkunum og spurði þær til vegar og tókst ásamt konu sinni að lokka þær upp í bíl sinn. Þær voru síðan myrtar.

Fourniret var handsamaður í Belgíu fyrir fimm árum þegar hann reyndi að ræna 13 ára stúlku en henni tókst komast úr klóm hans.