Hefðum verið sterkari með sigri

Guðni Ágústsson formaður Framsóknarflokksins segir niðurstöðu kosninga um sæti í Öryggisráð Sþ ekki koma sér á óvart. Eins og Vísir hefur greint frá höfnuðu Íslendingar í þriðja sæti í kosningu um sæti í Öryggisráðinu fyrir stundu og náðu því ekki kjöri.

„Ég hafði það á tilfinningunni að þetta væri erfitt allan tímann. En þetta var nánast vonlaust þessa síðustu daga því það hefur margt snúist okkur í óhag," segir Guðni sem vildi lítið segja til um hvort niðurstaðan séu vonbrigði.

„Það er margt sem við þurfum á að halda hér á næstu árum til þess að sameina þessa þjóð. Við hefðum kannski verið betur stödd með sigri í þessari kosningu," segir Guðni og nefnir þar árásir Breta í okkar garð á síðustu dögum.

„Bretar hafa gert á okkur loftárásir og við Íslendingar hefðum kannski verið sterkari og átt betri daga framundan með sigri í þessum kosningum. Og þar með betri aðgang að vinaþjóðunum."