Nýnasistar á metamfetamíni hugðust drepa Obama

Lögregla í Denver í Colorado hefur handtekið fjórmenninga, þrjá menn og konu, sem grunaðir eru um að hafa lagt á ráðin um að skjóta forsetaframbjóðandann Barack Obama til bana þegar hann ávarpar 80.000 manns á íþróttaleikvanginum þar á fimmtudag.

Málið hófst með handtöku 28 ára gamals manns sem ók glæfralega um götur Aurora, sem er í grennd við Denver, á sunnudagsmorgun. Sá handtekni var á leigðum pallbíl og leiddi leit í bílnum í ljós tvo kraftmikla riffla með mögnunarsigti, klæðnað í felulitum, handtalstöðvar, hárkollur, skotheld vesti, skilríki með nöfnum annars fólks og 44 grömm af metamfetamíni. Í kjölfarið var annar maður handtekinn eftir að hafa stokkið út um glugga á sjöttu hæð hótels í borginni. Sá öklabrotnaði við fallið og var skreyttur hakakrossi auk ýmissa muna sem tengdu hann við öfgasamtök hvítra manna.

Að lokum handtók lögregla par sem tengdist hinum tveimur. Fólkinu er haldið á grundvelli vopna- og eiturlyfjahandhafnar en við yfirheyrslur játuðu einhver þeirra að þau hefðu verið á leið til Denver gagngert til að ráða Barack Obama af dögum og hefði verið ætlun þeirra að skjóta hann „með kraftmiklum riffli af 750 metra færi frá stað í mikilli hæð."