Einar mestu óeirðir til þessa

Þrjátíu manns voru handteknir í fyrrinótt í einum mestu óeirðum sem brotist hafa út í Aþenu frá því að hinn 15 ára Alex Grygoropoulos var skotinn til bana af lögreglumanni á laugardaginn í síðustu viku. Þetta kom fram í gríska dagblaðinu Ta Nea í gær.

Í fyrradag voru haldnar minningarathafnir um piltinn víða um landið. Þær fjölmennustu voru á Stjórnarskrártorginu í miðborg Aþenu og svo í hverfinu Exarheía þar sem hann var skotinn.

Um nóttina fóru svo hópar manna um miðborgina með eldsprengjur og kveiktu í bílum, verslunum, bönkum og fleiru sem fyrir varð.

Í dag tekur gildi rýmri opnunartími verslana í Grikklandi í aðdraganda jóla en verslunarmenn eru afar svartsýnir og telja að viðskiptin í ár geti orðið allt að 70 prósentum rýrari en í fyrra.

Þar við bætist að verslunarhverfi borgarinnar eru illa farin eftir óeirðirnar sem staðið hafa í rúma viku og bjóða margar verslanir upp á allt að 50 prósenta afslátt til þess að reyna að ýta við kaupendum. Kostas Karamanlis forsætisráðherra hefur þó sagt að reynt verði að bæta tjón verslunareigenda eftir fremsta megni.