Fresta því að taka afstöðu til breyttra samskipta við Kúbu

Utanríkisráðherrar Evrópusambandsríkjanna frestuðu því í morgun að taka ákvörðun um það hvort afnema ætti ýmsar hömlur í samskiptum sambandsins við Kúbu. Verður ákvörðun þar um ekki tekin fyrr en á fimmtudag.

Meðal þess sem Evrópusambandið hefur bannað eru heimsóknir háttsettra embættismanna til eyjunnar en því var komið á í kjölfar deilna kúbverskra yfirvalda og sambandsins árið 2003.

Með afnámi hamlanna vill Evrópusambandið hvetja kúbversk stjórnvöld til þess að stíga fleiri skref í frjálsræðisátt, en nokkur hafa þegar verið tekin frá því að Raul Castro tók við af bróður sínum Fidel sem forseti kommúnistaríkisins í lok febrúar.