Leifur: Frábær frammistaða

Leifur Garðarsson var vitanlega í skýjunum með sigur sinna manna í Fylki sem unnu 2-1 sigur á FK Riga í Lettlandi í dag.

Um var að ræða fyrri viðureign liðanna í fyrstu umferð Intertoto-keppninnar en næsti leikurinn fer fram á sunnudaginn eftir rúma viku á Laugardalsvelli.

Valur Fannar Gíslason og Peter Gravesen skoruðu mörk Fylkismanna í dag.

„Þetta var einfaldlega frábær frammistaða hjá strákunum," sagði Leifur í samtali við Vísi. „Við lögðum upp með að vinna varnarleikinn vel og það var frábært að fá svo mark snemma í leiknum. Færslan og vinnan í liðinu var til fyrirmyndar."

Valur Fannar skoraði með skalla eftir hornspyrnu Hermanns Aðalgeirssonar um miðjan fyrri hálfleikinn. Peter skoraði svo úr vítaspyrnu á 70. mínútu eftir að brotið var á Allan Dyring.

Heimamenn náðu svo að minnka muninn fimm mínútum síðar með skoti sem fór í stöng Fylkismarksins, í bakið á Fjalari og inn.

„Við lögðum upp með að spila mjög þéttan varnarleik og koma hratt upp völlinn. Það gekk eftir. Þeir voru meira með boltann en það skilaði ekki miklu. Við fengum fleiri dauðfæri en þeir."

Leifur sagðist ekkert vita um þetta lið fyrir leikinn en hann stillti upp ungu liði í dag. Kristján Valdimarsson, Þórir Hannesson og Kjartan Ágúst Breiðdal í vörninni, Björn Orra Hermannsson á miðjunni og Hermann Aðalgeirsson í sókninni.

„Það er samt ekki hægt að taka neinn sérstaklega úr þessum hópi. Þeir stóðu sig allir vel, sérstaklega ungu mennirnir."

Leifur hrósaði einnig fimm stuðningsmönnum Fylkis og meðlimum stuðningsklúbbsins Kidda Tomm sem komu með í ferðina.

„Þessir fimm menn voru hreint ótrúlegir og þeir hreinlega áttu stúkuna. Lettarnir litu bara í kringum sig og voru eitt stórt spurningamerki," sagði Leifur og hló.

Ferðalagið gekk þó ekki klakklaust fyrir sig. „Hálftíma eftir að við fórum í loftið á fimmtudagsmorgun þurfti vélin að snúa við og lenda aftur í Keflavík. Þetta þýddi að við misstum af tengifluginu í Kaupmannahöfn sem við vorum að bóka. Við gátum þó sent fimmtán stráka áfram til Lettlands en án farangurs. Aðrir urðu eftir og fylgdu töskunum alla leið en fyrir þá tók ferðalagið alls 21 tíma."

„Manni var því hætt að litast á blikuna en þeir mættu þrátt fyrir þetta mjög vel stemmdir í dag. Þetta var frábært."