Eldri feður eignast skammlífari börn

Vísindamenn hafa fundið út að börn eru nær tvöfalt líklegri til að deyja áður en þau verða fullorðin eigi þau feður eldri en 45 ára en ef feður þeirra eru á milli 25-30 ára. Eru þetta niðurstöður viðamikillar rannsóknar þar sem 100 þúsund börn fædd á bilinu 1980-1996 voru skoðuð. Rannsakendur telja ástæðurnar liggja í verri gæðum sæðis karlmanna á þessum aldri.

Orsakir dauða margra barnanna var rakin til meðfæddra galla í hjarta og hrygg. Einnig var meira um sjúkdóma eins og einhverfu, geðklofa og flogaveiki.

Rannsóknin benti einnig til þess að börn feðra undir 19 ára aldri væru einnig með hærri dauðatíðni en líklegra var talið í rannsókninni að ástæður þess væru að finna vegna verra mataræðis og lífstíls foreldra.

Meira en 75 þúsund börn sem eiga feður yfir fertugu fæðast á ári hverju í Bretlandi sem er meira en einn tíundi af fæðingafjölda þar í landi. Meðalaldur feðra þar er 32 ára.

Fyrri rannsóknir hafa flestar lagt áherslu á aldur móður varðandi dauðatíðni barna og ekki tekið mið af aldri feðra. Hins vegar sýnir þessi rannsókn fram á að aldur móður sé þó enn stærri þáttur þegar kemur af dauðatíðni barna. Rannsóknin birtist í European Journal of Epidemiology.