West Ham og West Brom spila án auglýsinga

Enska úrvalsdeildarfélagið West Ham mun leika í ómerktum treyjum þegar það mætir West Brom í deildinni á morgun.

Breska sjónvarpið segir að samstarfi West Ham og ferðaskrifstofunnar XL hafi verið slitið eftir að XL varð gjaldþrota í dag.

West Brom er reyndar ekki heldur með auglýsingasamning og því munu bæði lið spila í auglýsingalausum treyjum á morgun, sem verður að teljast afar óvenjulegt.

Í yfirlýsingu frá West Ham í dag segir að búningasölu tengdri XL verði þegar í stað hætt.

"West Ham hefur ákveðið að slíta nú þegar samstarfi við XL í ljósi aðstæðna hjá fyrirtækinu. Allri búningasölu verður því hætt þar til annað kemur á daginn og þetta á líka við um auglýsingar tengdar fyrirtækinu."