Bann Scolari stytt

Luis Felipe Scolari, landsliðsþjálfari Portúgal, fær að stýra sínum mönnum í lokaleiknum mikilvæga gegn Finnum í undankeppni EM 2008.

Scolari fékk upphaflega fjögurra leikja bann fyrir að slá til Ivica Dragutinovic, leikmann serbneska landsliðsins, eftir leik liðanna í síðasta mánuði.

Þar með hefði Scolari misst af öllum leikjunum sem Portúgal á eftir í undankeppni EM 2008.

Banninu var breytt í tveggja mánaða bann sem lýkur þann 20. nóvember næstkomandi. Þar með nær hann síðasta leik riðilsins, gegn Finnum, sem fer fram degi síðar.

Hann þarf enn að greiða sekt upp á sautján þúsund Bandaríkjadala.

Scolari missir af leikjum Portúgals við þrjú neðstu lið A-riðils, Armeníu, Kasakstan og Aserbaídsjan.

Síðasti leikur Portúgals í riðlinum verður gegn Finnum á heimavelli en þessi tvö lið ásamt Pólverjum eiga í harðri baráttu um efstu tvö sæti riðilsins.