Þriðjudagsslúðrið á Englandi

Daily Mirror segir að Manchester United hafi fullan hug á að klófesta framherjann Carlos Tevez frá West Ham og blaðið segir að þeir rauðu ætli sér að klára málið fyrir helgi. Daily Mail segir framherjann þegar hafa samþykkt að fara til United, en að forráðamenn West Ham séu ekki jafn hrifnir af þeirri hugmynd.

The Sun segir að Chelsea hafi boðið 12 milljónir punda í bakvörðinn Pascal Chimbonda hjá Tottenham eftir að félaginu mistókst að fá til sín Daniel Alves hjá Sevilla. Þá segir Daily Express að Chelsea sé tilbúið að borga samtals 25 milljónir punda fyrir Chimbonda og Florent Malouda.

Nokkur bresku blaðanna hafa eftir Sven-Göran Eriksson að hann telji sig þurfa að kaupa amk 10 leikmenn til að gera liðið samkeppnishæft í ensku úrvalsdeildinni. Daily Star segir að Andriy Shevchenko hjá Chelsea hafi engan áhuga á að fara aftur til Ítalíu þrátt fyrir ítrekaðar fréttir þess efnis í blöðunum undanfarna mánuði.

Daily Star segir að West Ham sé tilbúið að greiða 11 milljónir punda fyrir Craig Bellamy hjá Liverpool og að félagið sé jafnvel tilbúið að senda Yossi Benayoun til Liverpool í skiptum. The Times segir Liverpool ætla að bjóða í vængmanninn Ricardo Quaresma hjá Porto.

Tottenham er sagt ætla að bjóða vængmanninn Wayne Routledge til West Brom í skiptum fyrir Curtis Davies - The Times. Þá segir Daily Star að Harry Kewell vilji endilega berjast fyrir framtíð sinni hjá Liverpool eftir erfið meiðsli - en hann hefur verið orðaður nokkuð við Tottenham.

Daily Mail segir að Alan Smith hafi þegar verið tjáð að hann eigi enga framtíð fyrir sér hjá Manchester United, en hann hefur verið orðaður við Everton og Middlesbrough. Nokkur blöð á Englandi fullyrða að Fiorentina á Ítalíu hafi gert 3 milljón punda tilboð í Freddie Ljungberg hjá Arsenal. Aston Villa mun bjóða í Jermain Defoe hjá Tottenham - Daily Star.

Daily Telegraph segir að Real Madrid og Chelsea séu við það að semja um kaupverð á hollenska landsliðsmanninum Arjen Robben. Framherjinn David Nugent gengur í raðir Portsmouth á næsta sólarhring - Ýmsir. Reading ætlar að kaupa framherjann Bobby Zamora á 2,5 milljónir punda - Mirror. Nicolas Anelka hjá Bolton er á óskalista Lyon í Frakklandi, en aðeins ef Bolton lækkar 10 milljón punda verðmiða sinn á honum - Mirror.

Daily Mirror segir að Arsene Wenger hafi samþykkti að selja Thierry Henry til Barcelona í ljósi þess að ítarlegar rannsóknir sýndu að hann væri búinn að skila sínu besta á knattspyrnuvellinum.

Að lokum greina bresk blöð frá því í morgun að framherjinn Teddy Sheringham sem gekk á dögunum í raðir Colchester, sé að vonast eftir því að mæta syni sínum í leik með Crystal Palace á næstu leiktíð. Charlie Sheringham er 19 ára gamall framherji.