Romario kominn með 999 mörk

Brasilíski framherjinn Romario skoraði eitt marka Vasco da Gama í 3-0 sigri liðsins á erkifjendunum í Flamengo í brasilísku úrvalsdeildinni í gær og hefur nú skorað 999 mörk á ferlinum, samkvæmt eigin talningu. Romario vantar nú aðeins eitt mark til að ná sínu stærsta markmiði á ferlinum.

Hinn 41 árs gamli Romario hefur lýst því yfir að hann ætli ekki að leggja skóna á hilluna fyrr en hann hafi náð 1000 mörkum og er allt eins líklegt að hann nái þeim áfanga á miðvikudaginn, en þá spilar Vasco gegn Americano.

Sá leikur á að fara fram á Sao Januario vellinum í Brasilíu, en Romario hefur beðið um að leikurinn verði færður á hinn goðsagnarkennda leikvang Maracana, sem er í miklu uppáhaldi hjá leikmanninum. "Ég myndi vilja ná þessum áfanga á ferli mínum á Marecana. Það yrði draumur," segir Romario.