Segir lífi hermanna sóað

„Við höfum sóað miklu af dýrmætasta fjársjóði okkar, sem er líf Bandaríkjamanna," sagði repúblikaninn John McCain í sjónvarpsþætti Davids Letterman á þriðjudagskvöldið.

McCain hefur aldrei hvikað frá stuðningi sínum við stríðið í Írak, en hefur á hinn bóginn harðlega gagnrýnt það hvernig George W. Bush forseti hefur staðið að stríðinu.

Það vakti mikla athygli þegar hann sagði í sjónvarpsþættinum að lífi bandarískra hermanna hefði verið „sóað" undanfarin fjögur ár í Írak. Demókratar segja nú eðlilegt að hann biðjist afsökunar á þessu orðalagi, þar sem Barack Obama, sem sækist eftir að verða forsetaefni demókrata, baðst afsökunar á sambærilegum ummælum nýverið.

McCain notaði annars tækifærið í sjónvarpsþættinum og tilkynnti að hann ætlaði að sækjast eftir að vera forsetaframbjóðandi Repúblikanaflokksins árið 2008. Hann sagðist ætla að lýsa því formlega yfir í apríl næstkomandi, í beinu framhaldi af ferð sinni til Íraks.

McCain sóttist einnig eftir því að verða forsetaefni flokksins árið 2000, en þá bar George W. Bush sigur úr býtum.