Brúarpartur hrundi niður

Ekki varð manntjón þegar hraðbrautarbrú í Oakland í Kaliforníu hrundi í gærmorgun eftir að bensínflutningabifreið valt undir brúnni. Eldur kviknaði í bensíninu og hitinn varð það mikill að hluti brúarinnar bráðnaði með þeim afleiðingum að nærri 230 metra langur hluti af brúnni hrundi.

Ökumaðurinn komst sjálfur út úr bílnum, þrátt fyrir nokkur meiðsli, og tók sér leigubíl á sjúkrahús. Ekki er vitað til þess að aðrir hafi slasast. Slysið varð snemma í gærmorgun þegar flestir íbúar Oakland voru enn í fastasvefni.