Edwards vill hækka skatta til þess að bæta heilbrigðisþjónustu

John Edwards, sem býður sig fram sem forsetaefni demókrata fyrir kosningarnar 2008, segir að hann vilji hækka skatta, aðallega á þá ríku, til þess að greiða fyrir bætta heilbrigðisþjónustu í landinu en hann kynnir áætlun þar að lútandi á morgun.

Í sjónvarpsviðtali í dag greindi Edwards lítillega frá áætlun sinni en hún gerir meðal annars ráð fyrir að um 50 milljónir Bandaríkjamanna sem ekki eru með sjúkratryggingu öðlist rétt á heilsugæslu og að lækniskostnaður millistéttarinnar verði lækkaður.

Áætlunin kostar á bilinu 90 til 120 milljarða bandaríkjadala, jafnvirði um 6300 til 8400 milljarða króna, og vill Edwards afla þeirra með aukinni skattheimtu. Edwards, sem var varaforsetaefni demókrata í síðustu forsetakosningum, vill auk þess ganga harðar fram í að innheimta þá skatta sem ekki hafa verið greiddir en þar liggi milljarðar bandaríkjadala.