Englendingar eru úr leik ef þeir tapa

Miðjumaðurinn Idan Tal hjá Bolton segir að Englendingar muni ekki komast á EM 2008 ef þeir tapa fyrir Ísraelsmönnum í leik liðanna í Tel Aviv á laugardaginn. Tal er ísraelskur landsliðsmaður og segir það sama uppi á teningnum hjá sínum mönnum. Englendingar og Ísraelar hafa 7 stig líkt og Makedónar í 3.-5. sæti E-riðilsins.

"Ég held að liðið sem tapar þessum leik á laugardaginn muni sitja eftir og missa af sæti á EM. Bæði lið verða nauðsynlega að vinna og þó enskir séu með sterkara lið en við, mega þeir eiga von á mjög erfiðum leik á Ramat Gan. Þar verða 50.000 áhorfendur búnir að syngja og tralla í þrjá tíma fyrir leik. Það er gríðarlega góð stemming í landinu fyrir leiknum og þjóðin er á öðrum endanum nú rétt fyrir þennan slag," sagði Tal í viðtali á heimasíðu Bolton.