Björn sakaður um hervæðingu

Hjarta almannavarna landsins verður í Samhæfingar- og stjórnstöðinni í Skógarhlíð í Reykjavík, sem dómsmálaráðherra heimsótti raunar í morgun ásamt samgönguráðherra í tilefni af samningi um nýjan fjarskiptabúnað fyrir Vaktstöð siglinga. Dómsmálaráðherra verður áfram æðsti yfirmaður almannavarna í landinu en felur ríkislögreglustjóra að annast málefni þeirra, samkvæmt frumvarpinu. Stefnumörkun verður falin almannavarna- og öryggismálaráði sem ekki aðeins meirihluti ríkisstjórnar mun sitja í, undir formennsku forsætisráðherra, heldur einnig allir helstu embættismenn þjóðarinnar, allt að 35 manns.

Athugasemd var gerð við það í þinginu að ráðið ætti að heita almannavarna- og öryggismálaráð. Siv Friðleifsdóttir sagði orðið "öryggismálaráð" vísa til hernaðar. Siv taldi þó flest horfa til framfara í frumvarpinu en gerði athugasemd við mikið vald til ríkislögreglustjóra.

Kolbrún Halldórsdóttir sagði frumvarpið fela í sér mikla útvíkkun á verksviði almannavarna með því að fella hernaðaraðgerðir og hryðjuverk undir þær og ályktaði að hervæðingin væri að hefja innreið sína. Hún talaði um lögregluvæðingu og mögulega hervæðingu.

Dómsmálaráðherrann sagði slíkan málflutning ekki ganga upp og sagði það algerlega út í bláinn að gefa slíkt til kynna. Ráðherrann sagði það skýrt að ríkislögreglustjóri væri borgaralegt stjórnvald og taldi lagabreytingar til mikilla framfara fyrir samfélagið.