Jónas Guðni: Þurfti á breytingu að halda

Jónas Guðni Sævarsson skrifaði í dag undir þriggja ára samning við KR. Hann sagði að hann hefði þurft á breytingu á nýrri áskorun að halda.

„Ég taldi að það væri kominn sá tímapunktur á mínum ferli þar sem ég þurfti á breytingu og nýrri áskorun á að halda,“ sagði Jónas. „Það var helst þess vegna sem ég ákvað að yfirgefa Keflavík, mitt uppeldisfélag. Það var mjög erfitt að taka þá ákvörðun.“

Bæði Valur og FH voru á höttunum á eftir Jónasi og sagði hann að hann hefði valið KR þar sem það væru spennandi tímar framundan hjá félaginu. 

„KR-ingar eru með mjög sterkan hóp og vel mannaðan,“ sagði Jónas. „Þjálfarateymið hér er gríðarlega sterkt og hlakka ég til að taka þátt í því ævintýri sem er framundan hjá félaginu. “ 

Undanfarin misseri hafa margir góðir knattspyrnumenn gengið til liðs við KR en margir ekki náð að standa undir þeim væntingum sem gerðar voru til þeirra. KR styrkti sinn leikmannahóp til að mynda mikið fyrir síðustu leiktíð en voru svo í fallbaráttu strax frá upphafi móts.

„Ég var alls ekkert hræddur við þetta,“ sagði Jónas. „Ég er einfaldlega að leita að nýrri áskorun. Ég stefni að því að bæta mig sem leikmann hjá KR og hjálpa félaginu að ná því markmiði sem við stefnum að.“ 

Jónas Kristinsson, fráfarandi formaður KR-Sports, sagði að með þessu væri búið að móta leikmannahóp KR fyrir næstu leiktíð.

„Við gleðjumst mikið yfir komu nafna míns í KR enda besti miðvallarleikmaður landsins.“