Álasund ætlar að ræða við Breiðablik um Guðmann

Reidar Vågner, yfirmaður knattspyrnumála hjá norska úrvalsdeildarliðinu Álasundi, sagði í samtali við Vísi að félagið ætlaði að ræða við Breiðablik um Guðmann Þórisson.

Guðmann kom í dag heim frá Noregi eftir að hafa æft í átta daga með Álasundi.

„Við höfum fylgst með Guðmanni í tvö ár,“ sagði Vågner. „Við vildum fá hann til okkar fyrir tímabilið en hann komst ekki þá. Því kom hann núna og æfði hjá okkur í viku en kynntist líka félaginu og borginni. Ég hef áður séð hann spila marga leiki en það er samt alltaf betra að sjá leikmanninn spila með okkar eigin leikmönnum.“

Vågner segir að nú á næstu dögum muni Álasund vera í sambandi við Breiðablik. „Við höfum ákveðið að taka málið á næsta stig og komast að því hvað við þurfum að gera til að fá hann til félagsins. Við erum þó líka að skoða nokkra aðra sambærilega leikmenn sem við höfum verið að fylgjast með en við höfum áhuga á að fá ungan miðvörð til félagsins.“

Hann segir að það hefði verið betra að sjá Guðmann taka þátt í æfingaleik með félaginu en að tækifæri hefði ekki gefist til þess á undanfarinni viku.

„Eftir að tímabilinu lýkur munum við æfa áfram í þrjár vikur og á þeim tíma spilum við tvo æfingaleiki. Það kæmi vel til greina að fá Guðmann út til okkar til að taka þátt í öðrum leiknum.“ 

Sem fyrr segir hefur Vågner fylgst náið með Guðmanni undanfarin ár og segir hann spennandi leikmann. „Hann hefur nú sýnt okkur sína styrkleika og í hverju hann þarf að bæta sig. Okkur finnst hann afar spennandi kostur.“