Frönsk herskip gegn sjóræningjum

Frakkar hafa boðist til þess að senda herskip til að vernda sjóleiðina við strendur Sómalíu gegn árásum sjóræningja. Hafsvæðið úti fyrir Sómalíu er talið vera eitt það hættulegasta í heimi.

Að minnsta kosti 17 skip hafa orðið fyrir sjóræningjaárásum á hafsvæðinu úti fyrir Sómalíu það sem af er þessu ári. Á sama tíma í fyrra voru árásirnar 8 talsins.

Sjóræningjarnar hafa valdið miklum truflunum á matarsendingum alþjóðlegra hjálparsamtaka til Sómalíu en flestar sendingarnar eru fluttar með skipum til landsins. Yfirmenn alþjóðlegra hjálparsamtaka hafa varað við þessum árásum og sagt að þær muni leiða til hungursneyðar í landinu. Talið er að um 1,2 milljónir manna séu háðar matarsendingum frá alþjóðlegum hjálparsamtökum. Vonast er til þess að aðstoð Frakka muni fæla sjóræningjana í burtu og tryggja sjóleiðina.

Sjóræningjarnir eru vel vopnum búnir og á hraðskreiðum bátum. Hingað til virðast þeir hafa meiri áhuga á því að taka áhafnir í gíslingu en að stela skipsförmum. Skemmst er að minnast þegar sjóræningjar héldu fimm manna áhöfn danska farmskipsins Danica White í gíslingu í tæpa þrjá mánuði síðasta sumar.