Dæmdur í 18 mánaða fangelsi fyrir ítrekuð brot

Héraðsdómur Reykjavíkur dæmdi í dag Ásgeir Heiðar Stefánsson í 18 mánaða fangelsi. Þá var Vilhjálmur Sverrir Pétursson dæmdur í 15 mánaða fangelsi, þar af 12 skilorðsbundna. Ákæran á hendur mönnunum var í 23 liðum. Þeir voru meðal annars kærðir fyrir fíkniefnabrot, innbrot, þjófnaði og umferðarlagabrot. Þeir játuðu brot sín í flestum tilfellum.

Vilhjálmur Sverrir var sýknaður af þremur ákærum. Að hafa tekið við þýfi sem stolið var í innbroti að Hraunbergi 11 í Reykjavík. Að hafa stolið myndvarpa úr versluninni Svar tækni í Síðumúla og að hafa keyrt undir áhrifum vímuefna í byrjun mars 2007.

Ásgeir neitaði sök í einum ákærulið. Að hafa tekið við bifhjóli sem hann vissi að hefði verið stolið. Framburður hans þótti ekki trúanlegur og var hann sakfelldur fyrir þennan ákærulið.