McClaren grátbað Carragher um að snúa aftur

Steve McClaren, landsliðsþjálfari Englendinga, fór í gær á æfingasvæði Liverpool til að ræða við Jamie Carragher. Hann grátbað leikmanninn um að endurskoða ákvörðun sína um að gefa ekki kost á sér í landsliðið og sagði honum að byrjunarliðssæti væri víst í fjarveru John Terry. Carragher neitaði.

Carragher lagði sem kunnugt er landsliðskóna á hilluna í fyrra og sagði því um að kenna að hann ætti ekki möguleika á byrjunarliðssæti. 

Enska landsliðið spilar þrjá landsleiki á næstunni. Einn vináttuleik við Þjóðverja og svo tvo leiki í undankeppni Evrópumóts landsliða, gegna Rússlandi og Eistlandi. Þar sem John Terry er ennþá meiddur neyðist McClaren til að notast við Sol Campell fyrst Jamie Carragher hefur ákveðið að leggja landsliðsskóna á hilluna.

"Ég fór og hitti Jamie í gær. Því miður stendur hann enn við ákvörðun sína um að spila ekki með okkur. Við verðum að virða að ákvörðun," sagði McClaren í morgun. Auk Terry, eru Jonathan Woodgate og Ledley King líka meiddir og McClaren því í töluverðri klípu.