Martins er maður 1. umferðar í Englandi

Nígeríski framherjinn Obafemi Martins, sem leikur með Newcastle, er leikmaður 1. umferðar ensku úrvalsdeildarinnar að mati Vísis. Martins fór á kostum þegar Newcastle bar sigurorð af Bolton, 3-1, og skoraði tvö mörk. Fyrra markið var sérstaklega glæsilegt, bakfallsspyrna úr miðjum teig sem Jussi Jaaskalainen, markvörður Bolton, átti ekki möguleika að verja.

Obafemi Martins, sem er fæddur í Lagos árið 1984, vakti fyrst athygli í unglingaliði ítalska félagsins Reggiana þegar hann var fimmtán ára gamall. Ári seinna var hann keyptur af stórliði Internazionale fyrir 50 milljónir og það tók hann aðeins eitt ár að vinna sig upp í aðallið Inter.

Martins, sem verður 23 ára, var aðeins nýorðinn átján ára þegar hann lék sinn fyrsta leik fyrir Inter í desember 2002 gegn Parma. Þrátt fyrir fína frammistöðu tókst honum ekki að festa sig í sessi í aðalliði Internazionale og sumarið 2006 varð ljóst að dagar hans hjá félaginu voru á enda. Þá kom Argentínumaðurinn Hernan Crespo á láni frá Chelsea og Svíinn Zlatan Ibrahimovic var keyptur frá Juventus.

Í kjölfarið var Martins seldur til Newcastle fyrir 10, milljón punda. Miklar vonir voru bundnar við þennan unga framherja og ekki minnikaði pressan þegar ljóst var að að hann tæki við treyju númer 9 af sjálfum Alan Shearer. Martins byrjaði illa með Newcastle en fann sig betur eftir því sem líða tók á tímabilið. Hann skoraði 17 mörk í 46 leikjum fyrir félagið.

Byrjunin í ár gæti ekki verið betri. Tvö mörk gegn Bolton og í þeim leik kom allt fram sem gerir Martins að einum hættulegasta framherja ensku úrvalsdeildarinnar. Hann er eldfljótur, gríðarlega sterkur og mjög skotharður. Það skemmir heldur ekki fyrir að hann fagnar mörkum sínum með slíkum tilþrifum að fimleikmaður í gólfæfingum á Ólympíuleikunum myndi ekki skammast sín fyrir það.

Ég er:

Nafn: Obafemi Martins

Aldur: 23 ára

Félög: Internazionale (Ítalíu) og Newcastle.

Númer: 9

Leikir/mörk í úrvalsdeildinni: 32/13*

Landsleikir/mörk: 17/11

*frá og með 12. ágúst 2007