Fabregas aðaltakmark Real Madrid fyrir næsta tímabil?

Aðaltakmark Real Madrid á næsta tímabili gæti orðið að klófesta Cesc Fabregas frá Arsenal. Real Madrid hefur oft lýst yfir áhuga sínum á miðjumanninum. Ramon Calderon, forseti félagsins, lofaði stuðningsmönnum Madrid að hann myndi fá Fabregas, Kaká og Arjen Robben til liðsins þegar hann bauð sig fram til forseta, en hann hefur ekki staðið við það hingað til.

„Það er mögulegt að þeir verði allir hjá félaginu á mínu þriðja ári í embætti," sagði Calderon. „Ég held að svo verði, en ég vil ekki skapa falskar væntingar hjá stuðningsmönnum liðsins."