Danska bullan gæti átt þriggja ára fangelsi yfir höfði sér

Danska bullan sem að réðst að dómaranum í leik Dana og Svía í undankeppni EM gæti átt yfir höfði sér þriggja ára fangelsisvist og þunga sekt fyrir athæfið. Krafa danska knattspyrnusambandsins á hendur bullunni nemur að minnsta kosti 110 milljónum króna.

Samkvæmt 244. grein dönsku hegningarlaganna er hægt að dæma fótboltabulluna í allt að þriggja ára fangelsi. Lars Berendt hjá danska knattspyrnusambandinu segir í samtali við danska útvarpið að krafa sambandsins á hendur fótboltabullunni nemi að minnsta kosti 10 milljónum danskra króna eða 110 milljónum íslenskra króna. Það skýrist í næsta mánuði hver bótakrafa sambandsins verður.

Knattspyrnusamband Evrópu dæmdi danska sambandið í tæplega þriggja milljóna króna sekt. Það eru smáarurar í samanburði við tekjutapið en Danir fengu að auki heimaleikjabann og verða að spila tvo næstu leiki á miklu minni velli en Parken, þjóðarleikvangi Dana.