Zola telur enska knattspyrnu gjalda fyrir fjölda útlendinga

Ítalinn Gianfranco Zola telur ástæðuna fyrir því hversu illa enska landsliðinu gengur að vinna titla sé sú að of margir útlendingar spili í úrvalsdeildinni á Englandi. Zola, sem er fyrrverandi leikmaður Chelsea segir að Ítalir gætu kennt englendingum margt.

Zola segir að ítölsk knattspyrna hafi hagnast mikið á því þegar aðeins þrír erlendir leikmenn máttu spila fyrir hvert lið í ítölsku deildinni á 9. og 10. áratug síðustu aldar. "Þessir leikmenn voru þeir bestu í heiminum og svo var kjarni liðsins Ítalir. Þetta var frábært jafnvægi," sagði Zola.

"Ég held að þetta hafi best sýnt sig með enska landsliðið á HM síðasliðið sumar. Það sást að það var mikil pressa á þeim og þeir gátu ekki höndlað þá pressu. Ítalska liðið var undir jafnmikilli pressu en notaði þá pressu til að spila betur," bætti Zola við.