McLaren: Við verðum að skora mörk

Steve McLaren, þjálfari enska landsliðsins í knattspyrnu, var ekki ánægður með framgöngu sinna manna fyrir framan marka Ísraela í viðureign þjóðanna í undankeppni EM í gærkvöldi. Enska liðið var mun meira með boltann og stjórnaði leiknum lengst af en gekk illa að skapa sér færi gegn vel skipulagðri vörn Ísraela.

"Úrslitin eru vonbrigði. Við fengum ekki mörg færi en hefðum átt að nýta þau sem við fengum," sagði McLaren, en undir hans stjórn hefur enska liðið aðeins skorað eitt mark í síðustu fimm leikjum. McLaren viðurkennir að þessi tölfræði valdi honum áhyggjum.

"Við verðum að skora mörk. Ísraelar gerðu okkur erfitt fyrir því þeir pökkuðu í vörn og voru harðir. Við byrjuðum illa og vorum hægir í okkar aðgerðum. Mér fannst við verða betri eftir því sem leið á leikinn og við hefðum átt að vinna. Við sóttum og spiluðum til sigurs en þetta gekk ekki upp," sagði McLaren ennfremur.