Ronaldinho leiddi Brasilíu til stórsigurs

Ronaldinho skoraði tvö mörk og átti mjög góðan leik fyrir Brasilíu sem gjörsigraði Chile, 4-0, í vináttuleik liðanna sem fram fór í Svíþjóð í dag. Dunga, þjálfari brasilíska liðsins, stillti upp Kaka og Robinho við hlið Ronaldinho í fremstu víglínu með þessum góða árangri.

Kaka og varnarmaðurinn Juan skoruðu hin tvö mörk Brasilíu, en leikmenn liðsins þóttu sýna frábæra takta á köflum, sérstaklega í síðari hálfleik. Dunga sagði í leikslok að hann hefði litið á leikinn sem mikilvægan undirbúning fyrir Copa America keppnina sem fram fer í júní.

“Eftir þessi fjögur mörk á fólk eftir að segja að við eigum sigurinn í Copa vísan. En svo er ekki. Þessi úrslit gáfu ekki rétta mynd af leiknum því mér fannst leikmenn Chile veita okkur verðuga keppni,” sagði Dunga.

Undir lok leiksins ruddust ungir stuðningsmenn Brasilíu á leikvanginn og urðu nokkar tafir á leiknum vegna þess. Allt fór þó vel að lokum en Dunga kenndi lélegu skipulagi sænskra um uppákomuna.