Grétar Rafn gjafmildur á afmæli sínu

Landsliðsmaðurinn í knattspyrnu, Grétar Rafn Steinsson, afþakkaði allar gjafir þegar hann hélt upp á afmæli sitt á árinu. Hann ákvað þess í stað að styrkja gott málefni. Hans Steinar Bjarnason greindi frá þessu í íþróttafréttum á Stöð 2 í kvöld og fréttina má sjá á VefTV síðar í kvöld.

Grétar hélt upp á 25 ára afmæli sitt í janúar síðastliðnum. Í stað þess að þiggja afmælisgjafir lét hann andvirðið renna til Rjóðursins, hvíldarheimilis fyrir langveik börn. Í Rjóðrinu dvelja átta börn allan sólarhringinn en þar að auki koma um 50 fjölskyldur reglulega með börn til hvíldarinnlagnar og endurhæfingar.

Grétar er nú staddur á landinu í landsleikjahléi frá félagsliði sínu AZ Alkmaar í Hollandi. Hann hélt nú síðdegis með glaðninginn til vistfólksins í Rjóðrinu.

Grétar mun svo opna styrktarsjóð í Landsbankanum fyrir Rjóðrið en frekar þröngt er orðið þar um starfseminua. Ekki var annað að sjá en að krakkarnir væru ánægðir með gjafirnar.