Ævintýralegur sigur Tottenham

Ekkert annað en fall virðist nú blasa við liði West Ham í ensku úrvalsdeildinni eftir að liðið tapaði 4-3 á heimavelli fyrir grönnum sínum í Tottenham í dag. Leikurinn var vægast sagt dramatískur og geta leikmenn West Ham ekki kennt neinum öðrum en sjálfum sér up tapið.

Fyrri hálfleikurinn var að öllu eign heimamanna þar sem Mark Noble kom West Ham í 1-0 og Argentínumaðurinn Carlos Tevez skoraði svo loksins sitt fyrsta mark fyrir félagið þegar hann skoraði beint úr aukaspyrnu. Tevez fagnaði markinu að hætti hússins - reif sig úr treyjunni og stökk inn í áhorfendaskarann og fékk að líta gult spjald fyrir. Staðan 2-0 í hálfleik og lið Tottenham í vondum málum eftir afleitan fyrri hálfleik.

Allt annað var uppi á teningnum í þeim síðari, þar sem gestirnir tóku öll völd og jöfnuðu með mörkum Jermain Defoe (víti) og glæsilegu marki Teemu Tainio á 63. mínútu. Lið West Ham var þegar þarna var komið við sögu algjörlega heillum horfið og stefndi í sigur gestanna. Eins og svo oft áður í vetur, skipti Tottenham alveg um gír um leið og jöfnunarmarkið kom og fór að spila jafn hræðilega og í fyrri hálfleiknum.

West Ham nýtti sér þetta og varamaðurinn Bobby Zamora skoraði laglegt skallamark með einni af sínum fyrstu snertingum og kom Hömrunum yfir á ný á 85. mínútu. Enn var þó mikið eftir af leiknum, því Tottenham jafnaði strax aftur með marki frá Dimitar Berbatov beint úr aukaspyrnu sem varamaðurinn spræki Taarabt fiskaði.

West Ham freistaði þess að ná í öll stigin og tjaldaði öllu í sóknina á lokasekúndunum í uppbótartíma, en það reyndist afdrifaríkt og Tottenham skoraði sigurmarkið úr skyndisókn í blálokin. Þar var að verki Kanadamaðurinn Stalteri sem renndi boltanum í tómt markið eftir að Green markvörður náði ekki að halda slöku skoti Jermain Defoe.

Niðurstaðan því enn eitt tapið hjá West Ham og sjónvarpsmyndavélar Sky-sjónvarpsstöðvarinnar sýndu myndir af örvæntingarfullum Eggerti Magnússyni í stúkunni.

Leikur West Ham í dag var skömminni skárri en liðið hefur sýnt undanfarnar vikur, en eftir þetta grátlega tap í dag er ljóst að ekkert annað en margfalt kraftaverk getur bjargað liðinu frá falli. Tottenham hefur eilítið rétt úr kútnum á síðustu vikum eftir að hafa valdið vonbrigðum lengst af vetri, en eins og sýndi sig í dag getur liðið ekki vænst þess að vera í efri hlutanum ef það spilar aldrei betur en á pari við andstæðinga sína.